Менск - гісторыя па фотаздымках

Гэты дзень у гісторыі. У Менску адкрыты новы Дом Чырвонай Армii (зараз Дом Афiцэраў)

DzedFyodar — Mon, 18 Nov 2013 07:16:54 GMT

18 лістапада 1936 года ў Менску быў адкрыты новы Дом Чырвонай Армii (зараз Дом Афiцэраў).

Цэнтральны Дом афіцэраў Узброеных Сіл Рэспублікі Беларусь ў Менску (першапачаткова Дом Чырвонай Арміі) – помнік савецкага постканструктывізму міжваеннага перыяду аўтарства Іосіфа Лангбарда.

Будаўніцтва Дому Чырвонай Арміі было распачата ў 1934 годзе на месцы колішняга архіерэйскага падвор'я ў Менску на вуліцы Скобелеўскай (цяпер Чырвонаармейскай). Новы гмах узводзіўся з выкарыстаньнем падмуркаў і сьценаў былога падвор'я, таму збудаваньне мае цікавае вырашэньне: галоўны фасад упрыгожаны магутнымі паўкруглымі пілястрамі, на флангах мае два магутныя рызаліты. Унутры будынка размешчана вялікая колькасьць досыць прасторных памяшканьняў: тэатральная зала, кіназала, басейн (першы ў Менску) і г.д.

«Глядзі Менск» (фотавыстава)

DzedFyodar — Mon, 18 Nov 2013 07:03:04 GMT

Адкрыццё: 20 лістапада ў 19:00
Працуе: па 30 лістапад 2013 года
Месца: кінатэатр «Перамога» (г.Менск, вул. Інтэрнацыянальная, 20)
Уваход вольны.

Аўтар: Аляксандра Баярына
Куратар: лёна Шаліма

Гарадская прастора выдатна рэжыцца. Як торт, як пірог... Едзеш па горадзе і поглядам адразаеш кавалак за кавалкам. На фасадзе вісіць парачка і размахвае пэндзямі, на прыпынку ўсе сядзяць у аднолькавых позах, дзяўчына ў чырвоным выйшла з чырвонай машыны - унутры цябе спрацоўвае пстрычка і вось ты ўжо працягваеш рух з выразаным ў памяці прастакутнікам. Ці акрэсліў поглядам групу школьнікаў, якія пераходзяць дарогу. Калі яны пераходзяць дарогу прыгожа, робіш два-тры кадры... А калі сьвятло заходзячага сонца падсвеціць іх сілуэты і доўгімі, рухомымі ценямі накрые палову праезнай часткі, то, мабыць, я б зрабіла кадраў пяць-шэсць... Столькі, колькі паспела б, каб захаваць у памяці ўсе імгненьні гэтага відовішча. Па сутнасьці, прастора ёсьць сукупнасць зрэзаў! Рух - паслядоўнасьць выразаных з рэчаіснасьці кадраў. У памяці застаецца толькі тое, што ты скадраваў, і ня важна, з фотаапаратам ты гэта зрабіў ці без яго»...

***

Аляксандра Баярына

Архітэктар, дызайнер інтэр'ераў, публіцыст, архітэктурны крытык, член Беларускага саюза архітэктараў, Беларускага саюза дызайнераў, выкладчык Архітэктурнага факультэта БНТУ.

Фатаграфіяй захаплялася з дзяцінства. Першыя фатаграфіі былі зробленыя на «Зеніт» бацькоў. У сферу інтарэсаў уваходзіла толькі архітэктура. Чорна-белыя фота поўніліся гарадскімі відамі, будынкамі і іх фрагментамі. Чалавек у кадры на той момант быў лішнім. З часам аўтара сталі цікавіць людзі і іх месца ў гарадскім асяроддзі.

Экспазіцыю склалі фота, знятыя на працягу апошніх 5 гадоў на лічбавую камеру.

КДБ, Нацбанк і крама пад гадзіньнікам. Споўнілася 120 гадоў з дня нараджэньня архітэктара Парусьнікава

DzedFyodar — Wed, 13 Nov 2013 06:45:57 GMT

Дзякуючы маскоўскаму архітэктару Міхаілу Парусьнікаву ў Менску з'явіліся знаёмыя нам будынкі Нацбанка і КДБ. З яго ўдзелам аформіўся выгляд галоўнай вуліцы Менску, якую мы сёньня ведаем як праспект Незалежнасьці. Міхаіл Парусьнікаў быў і суаўтарам спартыўнага комплексу "Дынама". Ён нарадзіўся 12 лістапада 1893 года, а гэта значыць, што яму роўна 120 гадоў, паведамляе news.tut.by.

Міхаіл Парусьнікаў

Кароткая даведка. Хто такі Парусьнікаў?

На сайце Цэнтральнай навуковай бібліятэкі імя Якуба Коласа ў біяграфічнай даведцы, прысьвечанай Міхаілу Парусьнікаву, напісана, што ён нарадзіўся ў Маскве, скончыў Маскоўскае вучылішча жывапісу, скульптуры і дойлідства, а потым Вышэйшыя мастацка-тэхнічныя майстэрні. У гады Вялікай Айчыннай вайны Міхаіл Парусьнікаў працаваў на пасадзе старэйшага навуковага супрацоўніка Акадэміі архітэктуры СССР. У 1944-1948 гг. - Кіраўнік архітэктурна-праектных майстэрняў Камітэта па справах архітэктуры СССР.

Ён аўтар праекта планіроўкі і забудовы Астрахані (1930), шэрагу жылых дамоў на праспекце Міру ў Маскве (1936), аўтар праекта павільёна машынабудаваньня на Ўсерасійскай сельскагаспадарчай і саматужна-прамысловай выставе (1923) і будынка ў Яраслаўлі. Аднак самы вялікі ўклад Парусьнікаў унёс у архітэктуру Беларусі. У 1968 годзе атрымаў Дзяржаўную прэмію БССР.

Першым збудаваньнем на сучасным праспекце Незалежнасьці ў пасьляваенным Менску быў будынак Міністэрства дзяржбяспекі БССР (дом №17), які пачалі ўзводзіць вясной 1945. Пра гэта ў сваім артыкуле на TUT.BY аб пасьляваенным аднаўленні Менску пісаў краязнаўца Ўладзімір Валожынскі.

Дарожныя работы на вул. Савецкай - будучыні пр. Сталіна.

"На архітэктара - Міхаіла Парусьнікава - легла двайная адказнасьць: аб'ект будаваўся для ўсемагутнай у СССР арганізацыі, і будынак, будучы пабудаваны першым, павінен быў задаваць тон у будучай архітэктуры ўсяго праспекта Сталіна. Будаўніцтва завяршылася 1 сьнежня 1947 г. На будынку была ўсталявана вежа (з ёй звязана некалькі менскіх легенд). Гэтая вежа - самае высокае месца першай лініі цяперашняга праспекта Незалежнасьці - з'яўлялася па задуме М.Парусьнікава кампазіцыйным цэнтрам ўсёй частцы праспекта ад цяперашняй плошчы Незалежнасьці да плошчы Перамогі. Кажуць, што будынак КДБ на праспекце Незалежнасьці ў свой час быў прызнаны лепшым архітэктурным творам у СССР", - гаворыцца ў артыкуле.

Праектны позірк на будынак Міністэрства дзяржбяспекі з боку бульвара па вул. Камсамольскай.
Архітэктары М. Парусьнікаў, Г. Баданаў.

Разам з іншымі архітэктарамі Міхаіл Парусьнікаў распрацоўваў эскіз планіроўкі Менску, у якім вызначыліся асноўныя напрамкі планіровачнага развіцьця нашага горада, у суаўтарстве ён распрацоўваў і праект планіроўкі і забудовы вуліцы Савецкая (праспект Незалежнасці).

Праект планіроўкі і забудовы Савецкай вул. (пр. і пл. Незалежнасці). Аўтары праекта: Парусьнікаў М.П., Асмалоўскі М.С., Кароль В.А., Баданаў Г.П.

Адначасова вялася праца па планіроўцы і забудове ансамбля Цэнтральнай плошчы (сёньня - Кастрычніцкая плошча), якой пастараліся надаць строгі выгляд. Забудова плошчы сфармавалася ў 1950-1960 гг., першапачаткова па праекце, распрацаваным архітэктарамі Г. Баданавым, В. Каралём, Л. Мацкевічам, М. Асмалоўскім, М. Парусьнікавым.

У 1945-1954 гадах па праектах Парусьнікава будавалі адміністрацыйныя будынкі, напрыклад, будынак Дзяржбанка, а цяпер - Нацыянальнага банка Рэспублікі Беларусь.

Будынак Дзяржбанка (цяпер - Нацбанк Беларусі).
Будынак ўзвялі ў 1947 - 1952 гадах.

Вялікі ўклад унёс М.П. Парусьнікаў ў жыльлёвае будаўніцтва Беларусі.

Ад Камсамольскай у бок вул. Свярдлова. Злева - ведамасны 87- кватэрны жылы дом № 16 з харчовай крамай на першым паверсе. Сярэдзіна 1950-х, архітэктар Парусьнікаў.
З кнігі Віталя Кірычэнкі "Мінск. Гістарычны партрэт горада".

Пад яго кіраўніцтвам і з яго удзелам былі пабудаваныя жылыя дамы па цяперашнім праспекце Незалежнасьці, а таксама жылыя дамы і мост праз раку Свіслач.

Раён Цэнтральнай плошчы. Справа - жылы дом Менскай ЦЭЦ -2 (цяперашні адрас - праспект Незалежнасці, 23; архітэктар Г.Заборский, М.Парусников; 1954). У ім 20 студзеня 1955 адкрыў свае дзверы новы гастраном (№ 13) - адзін з найбуйнейшых у сталіцы і рэспубліцы (папярэднік сучаснага універсама "Цэнтральны". У верхняй частцы дома № 23 (роўна як і суседняга, які знаходзіцца насупраць, - № 22) сёньня ўжо адсутнічаюць групы дэкаратыўных элементаў (на фота відаць над балюстрадай. Фота сярэдзіны 50-х., з кнігі Віталя Кірычэнкі "Мінск. Гістарычны партрэт горада".

Жылы дом, архітэктары Г. Заборскі, М. Парусьнікаў, 1949-1953 гг .

Жылы дом на Савецкай вуліцы. Архітэктар Парусьнікаў.

Дом №17 па пр.Незалежнасці, арх. М.Парусьнікаў і Г. Баданаў. Зараз у гэтым доме знаходзіцца кафэ "Васількі".

Акрамя таго, Міхаіл Парусьнікаў з'яўляўся суаўтарам у групе архітэктараў, праектаваўшых спартыўны комплекс "Дынама" ў Менску.

Від на стадыён "Дынама". Частка панарамнага фота А. і М. Ананьіных, Фота з кнігі Віталя Кірычэнкі "Мінск. Гістарычны партрэт горада".

Выстава «Менск на старых паштоўках» адкрылася ў музэі гісторыі горада

DzedFyodar — Tue, 30 Jul 2013 19:50:31 GMT

Больш за паўсотні вялікіх фотакопій паштовак канца XIX - пачатку ХХ стагоддзя размешчаны ў Музэі гісторыі горада Менску. Тут адкрылася выстава «Менск на старых паштоўках».

Як расказала карэспандэнту агенцтва «Мінск-Навіны» старшы навуковы супрацоўнік музэя Ірына Сінькевіч, аж да 1918 году гэтыя паштовыя карткі выдаваліся прыватнымі выдавецтвамі, выходзілі серыямі, невялікімі накладамі. Паштоўкі друкаваліся са здымкаў мясцовых фатографаў, прычым фатографам трэ было мець дазвол на ўвекавечаньне відаў роднага горада. Часьцей за ўсё здымалі самую доўгую, шумную і багатую вуліцу Менску - Захар'еўскую (цяпер праспэкт Незалежнасьці). Амаль не выдаваліся паштоўкі з відамі ўскраін - Ляхаўка, Камароўка, дзе жылі бедныя людзі. На картках можна ўбачыць менчукоў самых розных саслоўяў, конку, сялянскі воз і першы аўтамабіль. Дакументальна зафіксаваны выгляд вуліц, асобных будынкаў, якіх даўно няма.

Выстава будзе доўжыцца да 8 верасня.

У сталіцы з'явіліся вуліцы Вербная, Калядная і Сьмілавіцкі тракт

DzedFyodar — Thu, 27 Jun 2013 08:17:21 GMT

Дэпутаты на 24-й сесіі Мінгарсавета прысвоілі шэраг найменьняў састаўным часткам Менску, перадае карэспандэнт агенцтва "Мінск-Навіны".

Так, праектаваная вуліца №1 у межах вул. Вяснянка, зав. Весніка, пр. Пераможцаў названая "вуліца Вербная", а праектуемая вуліца №1 у межах вул. Мікалаеўская, вул. Зацень - "вуліца Калядная".

"Гэтыя вуліцы з'явяцца ў найпрыгажэйшых месцах сталіцы, і іх назвы не супярэчаць іншым назвам тутэйшых вуліц, яны мілагучны як па руску, так і па беларуску", - патлумачыла начальнік упраўленьня культуры Мінгарвыканкама Віталіна Рудзікава.

Участак аўтамабільнай дарогі М-4 Мінск - Магілёў - працяг Партызанскага праспекта працягласьцю 3,8 км да павароту на Стайкі - атрымаў назву "Смілавіцкі тракт".

Што да аўтамабільнай дарогі М-9 Кальцавая дарога вакол Менску, якая перайшла ва ўласнасць горада ў статусе магістральнай вуліцы бесперапыннага руху, то прынята рашэньне пакінуць яе звыклае найменьне - "Вуліца Мінская кальцавая аўтамабільная дарога".

Афіцыйную назву атрымаў і будуемы жылы раён у межах пр. Незалежнасці, МКАД, вул. Ф. Скарыны, праезда перад лесапаркавай зонай - "мікрараён "Магістр".

Таксама вырашана перайменаваць вуліцу Курсанта Гвішыяні ў завулак Рагачоўскі.

"Гэтая вуліца была названа ў 2007 годзе. Яна размешчана на закрытай тэрыторыі ваеннага гарадка, і будаўніцтва дамоў па гэтай вуліцы не прадугледжваецца. Да цяперашняга часу па гэтай вуліцы не зарэгістраваныя дамы - два навучальных корпусы і курсанцкі інтэрнат, - удакладніла В. Рудзікава. - У сувязі з гэтым раней Мінгарсаветам было прынята рашэнне назваць вуліцай Курсанта Гвішыяні праектуемую вуліцу №1 у мікрараёне Ўсходні. З мэтай упарадкаваньня найменьняў вулічна-дарожнай сеткі просім падтрымаць рашэньне камісіі аб перайменаваньні існуючай вуліцы Курсанта Гвішыяні ў завулак Рагачоўскі - па назве найбліжэйшай вуліцы Рагачоўскай".

У Менску з'явяцца вуліцы Вербная і Сёмкаўская

DzedFyodar — Wed, 15 May 2013 12:41:55 GMT

Такая прапанова аб назове праектаваных ў сталіцы вуліц у межах вуліцы Вяснянка - зав. Вяснянка - пр. Пераможцаў.

Як паведамілі карэспандэнту агенцтва «Мінск-Навіны» ва ўпраўленьні культуры Мінгарвыканкама, камісія па найменьні і перайменаваньні праспектаў, вуліц, плошчаў і іншых складовых частак г. Менску ў адпаведнасьці з рашэньнем Менскага гарадскога Савета дэпутатаў ад 12 сакавiка 2008 г. № 127 "Аб найменаваньні і перайменаваніні праспектаў, вуліц, плошчаў і іншых складовых частак г. Менску» 17 красавіка 2013 г вырашыла ўнесьці наступныя прапановы аб найменьні праектуемых вуліц у г. Менску ў межах вуліцы Вяснянка - зав. Вяснянка - пр. Пераможцаў:

праектаваную вуліцу № 1 назваць вуліцай Вербнай;
праектаваную вуліцу № 2 назваць вуліцай Сёмкаўскай;
праектаваную вуліцу № 4 назваць завулкам Семкаўскім.

Упраўленне культуры Мінгарвыканкама (220006, г. Мінск, вул. Маякоўскага, 22, кар. 2) прымае меркаваньні жыхароў горада па прапанаваных назвах на працягу 2 тыдняў пасьля публікацыі матэрыялу ў прэсе.

Штогадовы аматарскі марафон «Налібокі`13» чакае сяброў!

DzedFyodar — Wed, 27 Mar 2013 05:56:09 GMT

* на правах рэклямы

25-26 траўня 2013 года адбудзецца штогадовы марафон «Налібокі`13». Тры дысцыпліны, тры новыя маршруты, дваццаць чатыры гадзіны задавальненьня, сотні удзельнікаў у сутачным аматарскім марафоне «Налібокі`13».

Для зручнасьці ўдзельнікаў, месца старту і фінішу будзе размешчана ў адным месцы - у маляўнічай даліне ракі Заходняя Бярэзіна, непадалёк ад чыгуначнай лініі Ліда - Маладэчна і буйной аўтамагістралі Менск - Вільня.

Пяты юбілейны марафон правядзе вас па яшчэ незнаёмых кутках - паўночнай часцы Налібоцкай пушчы.

У гэтым годзе траса складаецца з серыі колцавых маршрутаў складзеных ў ланцуг і злучаных паміж сабой КП (кантрольныя пункты), на якіх вас чакаюць ежа, вада і ветлівасць валанцёраў. Такім чынам, кожны зможа выбраць дыстанцыю сабе па сілах.

Падрабязная каляровая мапа і лягенда, маркіроўка трасы дапамогуць арыентавацца на дыстанцыі марафону нават пачаткоўцам. Для таго, каб б вы змаглі ацаніць іх загадзя, мапа марафону з нанесенымі на яе маршрутамі будзе апублікаваная ў інтэрнэце.

А пераможа той, хто «нанізае» кольцы дыстанцыі сабе на чып (чып электроннай адзнакі) хутчэй астатніх.

МУЛЬЦІМАРАФОН

У гэтым годзе ўведзены новы клас - мульцімарафон, які ўключае ў сябе чаргаваньне дысцыплін ровар і бег, а таксама «нашпігованы» сплавам па рацэ Заходняя Бярэзіна і фінішным вяровачным этапам.

Тут будзе амаль усё, што дастаўляе задавальненьне мульціспартоўцу: барацьба сярод самых-самых, сцёртыя ногі і мокры азадак, шалёная пагоня за лідарам і цвярозы разьлік.

У адрозненьні ад традыцыйных камандных прыгодніцкіх гонак, гэта выдатная магчымасьць праверыць свае ўласныя сілы, бо гэты марафон праходзіць у фармаце «сола».

Не сакрэт, што пераадольваць вялікія адлегласьці прыемней, рухаючыся вольным. Кожны ўдзельнік мульцімарафона «Налібокі`13» атрымае такую магчымасьць: на пункты зьмены відаў прадугледжаны закід трэкінгавага абутку, а рыштунак для вяровачнага этапаў і сплава даецца арганізатарамі.

Званьне самага крутога «Мульці-Лося» дастанецца чалавеку, які хутчэй астатніх адолее каля 150 км на ровары і каля 50 км бегам плюс усё астатняе.

РОВАРНЫ МАРАФОН

Гэта сапраўднае сьвята для аматараў ровара. Агульны старт для ўсіх удзельнікаў будзе дадзены з маляўнічай паляны на беразе ракі Заходняя Бярэзіна, пасьля чаго ў кожнага будуць суткі на пераадоленьне маршруту.

Частка дыстанцыі ўсе раварысты будуць пераадольваць разам, аднак, затым, іх сьцяжынкі разыдуцца, у залежнасьці ад абранага кіламетражу. Для аматараў правесьці дзень «у сядле» нарыхтаваная дыстанцыя больш за 200 км. Але, вядома ж, не згубіцца на марафоне і аматар-пачатковец, які зможа абраць для сябе патрэбную дыстанцыю ад 60 км і больш. Для выгоды марафонцаў на мапе будуць адзначаны кропкі з пітной вадой і харчаваньнем.

Пры выбары дарог для марафону арганізатары зыходзілі з прынцыпу «мінімум асфальту - максімум задавальненьня», і ў выніку вас чакае 95% цікавых лясных сьцяжынак.

БЕГАВЫ МАРАФОН

Адрозьніваецца ад свайго роварнага брата-блізнюка толькі сродкам перамяшчэньня і меншай даўжынёй дыстанцыі.

Аматары бегу памераюцца сіламі на дыстанцыі даўжынёй ў два класічных марафона (каля 85 км). Тым, каму такая дыстанцыя здасца занадта вялікай, даецца магчымасьць ацаніць свае сілы падчас вясновай прагулкі па запаведных лясах на скарочанай дыстанцыі.

ЗАЛІКІ МАРАФОНАЎ І «"РАЗДАЧА СЛАНОЎ»

На фінішы вы зможаце атрымаць асалоду ад заканчэньня марафону, адпачыць і папоўніць свае сілы, папарыцца ў палявой лазьні. Ну і, вядома ж, пераможцаў будуць чакаць заслужаныя ўзнагароды.

Залік марафону праводзіцца ў кожным відзе, ў розных узроставых катэгорыях. Плюс да ўсяго будзе асобна выдзелены камандны сямейны залік для дзяцей і іх бацькоў. На подыюм ўзыдуць каманды-пераможцы.

Кожны ўдзельнік марафону атрымае памятны сувенір, а кожны прашэдшы поўную дыстанцыю - арыгінальнае пацверджаньне сваёй мужнасьці. Тройка пераможцаў у кожнай з катэгорый атрымае медалі і прызы. Гэтак жа будуць выдзеленыя абсалютныя пераможцы, што праехалі/прабеглі максымальную дыстанцыю за лепшы час. Акрамя гэтага будуць адзначаны самыя юныя і самыя сталыя ўдзельнікі марафону.

Калі вы не сталі пераможцам - у вас усё роўна будзе шанец атрымаць каштоўны падарунак, паўдзельнічаўшы ў традыцыйнай латарэі сярод усіх удзельнікаў марафону. Для гэтага неабходна толькі прысутнічаць на ўзнагароджаньні.

Падрабязную інфармацыю па маратону «Налібокі`13» можна атрымаць на сайце promwadtour.com.

Размовы пра марафону вядзецца на сайце аматараў актыўнага адпачынку і турызму poehali.net.

Новыя вуліцы Менску

DzedFyodar — Wed, 20 Mar 2013 13:02:58 GMT

Па аб'екце «Забудова кварталаў малых жылых дамоў у раёне Цнянскага вадасховішча ў межах вуліц Кальцова - Праектуемая № 10 - Праектуемая № 11 - Праектуемая № 12 - Праектуемая № 14 - пер. Кальцова 4-й - вуліца Собинова ў г. Менску»:

Праектуемую вуліцу №10 назваць вуліцай Гайненскай.
Праектуемую вуліцу №11 назваць вуліцай Лукомскай.
Праектуемую вуліцу №12 назваць завулкам Гайненскім.
Праектуемую вуліцу №14 назваць завулкам Лукомскім.
Безыменны праезд ад МКАД да аэрадрома «Ліпкі» назваць вуліцай Ліпкоўскай.
Безназоўны праезд ад вуліцы Ліпкоўскай да аэрадрома «Ліпкі» назваць завулкам Ліпкоўскім.
З нагоды 1150-гадовага юбілею горада Полацка назваць Полацкім паркам безназоўную паркавую зону ў межах вуліц Карбышава, Сядых і Лагойскага тракта.
Безыменны праезд - працяг вуліцы Слабадской на ўчастку ад вуліцы Ясеніна да МКАД назваць вуліцай Альшанскай.
Безыменны праезд на ўчастку ад вуліцы Калеснікава да разваротнага транспартнага кола ГЦ "Ждановічы" назваць завулкам Калеснікава.
Безыменны праезд у прамысловай зоне Калядзічы на ўчастку ад вуліцы Бабушкіна да вуліцы Прафсаюзнай назваць Станцыйным завулкам.

Упраўленне культуры Мінгарвыканкама (220006, Мінск, вул. Маякоўскага, 22, корп. 2) прымае меркаваньні жыхароў нашага горада па прапанаваным назвам на працягу 2 тыдняў пасьля публікацыі гэтай інфарммацыі ў СМІ.

Нізкі рынак у Мінску. Праектная прапанова па аднаўленню.

DzedFyodar — Tue, 05 Mar 2013 08:44:04 GMT

Яшчэ 11 лютага бягучага году Беларускае добраахвотнае таварыства аховы помнікаў гісторыі і культуры перадало на разгляд у Міністэрства культуры Рэспублікі Беларусь, Камітэт архітэктуры і горадабудаўніцтва Мінгарвыканкаму і КУП "Мінская спадчына” вынік працы сваёй архітэктурнай секцыі - Эскізны праект аднаўлення жылой і грамадзянскай забудовы тэрыторыі Нізкага і Мяснога рынкаў (кварталы № 3; 29; 30) на тэрыторыі комплекснай гісторыка-культурнай каштоўнасці "Гістарычны цэнтр Мінска”.

Адказу покуль не паступала ані з воднай інстанцыі, а пісьмовая інфармацыя з боку адміністрацыі Цэнтральнага раёна Мінска дазваляе папярэдне меркаваць, што ні чыноўнікі Мінгарвыканкаму, ні чыноўнікі Міністэрства культуры, ні члены Беларускай рэспубліканскай навукова-метадычнай рады па пытаннях гісторыка-культурнай спадчыны пры Міністэрстве культуры Рэспублікі Беларусь не зацікаўлены ва ўзважаным, непарадузятым і прафесійнам разглядзе і ацэнцы праектнай прапановы.

Прычына простая - пазітыўная адзнака праектнай прапановы азначае негатэўную адзнаку сваёй дзейнасці, якая прывяла ла прынцыповага змянення гістарычнай планіровачнай структуры, ландшафту і спосабу забудовы нерухомай матэрыяльнай гісторыка-культурнай каштоўнасці міжнароднага значэння "Гістарычны цэнтр Мінска”; фальсіфікацыі схемы чырвоных ліній гістарычнай забудовы; знішчэння і страты без адпаведных навуковых фіксацый і належнага вывучэння, наяўных і абсалютна не вывучаных элементаў існай тут колісь высокашчыльнай гарадской гістарычнай забудовы; стварэння новай горадабудаўнічай сітуацыі, якая пазбаўляе гісторыка-культурную каштоўнасць яе якасных характарыстык і не дазваляе праводзіць далейшую работу ў адпаведнасці з дзеючымі рэстаўрацыйнымі методыкамі.

Аб праекце ўжо паведамлялася на сайце аб’яднання ў лютым месяцы. Былі прадстаўлены нешматлікія графічныя матэрыялы, можна было азнаёміцца з тлумачальнай запіскай (http://pomniki.budzma.org/news/charhovy-padarunak-stalichnamu-horadu). А ў сітуацыі, якая склалася вакол Гістарычнага цэнтру Мінска, пры відавочным нежаданні службы заказчыка па Гістарычнаму цэнтру (КУП "Мінская спадчына”) нават абмеркаваць перададзеныя ім праектныя прапановы, альбом з графічнымі матэрыяламі павінен стаць аб’ектам шырокага грамадскага азнаямлення.

Таму Вашай увазе альбом з праектнымі прапановамі і прадстаўляецца. З праектнымі прапановамі, якія нашыя апаненты называюць спробай стварэння муляжу гарадской забудовы кан. 19 - пач. 20 ст., абапіраючыся, па версіі "вертыкальшчыкаў” на схематычныя архіўныя матэрыялы. Пры жаданні нашых апанентаў захаваць усё самае лепшае, што ёсць у Гістарычным цэнтры, а для іх гэта тое, што ўзнікла пасля 1945 г., і мабыць пры жаданні, каб яшчэ на незасвоеных пляцоўках Гістарычнага цэнтру з’яўляліся архітэктурныя "шэдэўры”, распрацаваныя на падставе дакладнейшых навуковых вышуканняў, па тыпу забудовы на Нямізе, Мінскага замчышча аўтарства С.Багласава, ды і іншых выбітных прыкладаў "руплівых” падыходаў да гістарычнага сэрца нашай сталіцы, прапановы ГА БДТАПГК зноўку выконваюць ролю лыжкі дзёгцю ў бочцы саладжавага мёду псеўдарэгенерацыі Гістарычнага цэнтру Мінска.

Поўнасьцю праект апублікаваны на сайце Беларускага добраахвотнага таварыства аховы помнікаў гісторыі і культуры

Якім быць Старому Менску — вырашаць чыноўнікі ці менчукі?

DzedFyodar — Mon, 14 Jan 2013 06:08:30 GMT

16 студзеня ў Саюзе архітэктараў пройдзе публічная сэсія па праекце аднаўленьня гістарычнага цэнтру Менску. Адмыслоўцы заклікаюць неабыякавых людзей далучыцца да мерапрыемства.

Ігар Карней

Ад 5 да 26 студзеня адміністрацыя Цэнтральнага раёну Менску выставіла на грамадзкае абмеркаваньне «Унясеньне зьменаў у горадабудаўнічы праект дэталёвага плянаваньня рэканструкцыі, рэстаўрацыі, аднаўленьня і добраўпарадкаваньня Гістарычнага цэнтру гораду». З матэрыяламі можна азнаёміцца непасрэдна ў раённай адміністрацыі, там жа ёсьць магчымасьць пакінуць свае заўвагі ці накіраваць іх поштай.

Старшыня Беларускага таварыства аховы помнікаў гісторыі і культуры Антон Астаповіч заклікае ўсіх, каму неабыякавы лёс гораду і лёс агульнанацыянальнай гісторыка-культурнай спадчыны, «не змагацца зь бюракратамі на форумах», а дасылаць свае прапановы канкрэтнаму адрасату. Дзякуючы высілкам арганізацыі, усё ж удалося дамагчыся публічнай сэсіі абмеркаваньня праекту, пра што нават не было і гаворкі яшчэ тыдзень таму.

Дагэтуль, на перакананьне спадара Астаповіча, усё рабілася дзеля таго, каб праз фармальную працэдуру зацьвердзіць горадабудаўнічы акт, які б легітымізаваў усе ранейшыя парушэньні нарматыўна-прававых, тэхнічных і мэтадычных дакумэнтаў пры правядзеньні працаў у гістарычным цэнтры. Гэта дае магчымасьць весьці работы практычна ў такім жа рэжыме, як і раней, што, на ягоную думку, прывядзе да канчатковай страты ўсіх якасных характарыстык комплекснай матэрыяльнай гісторыка-культурнай каштоўнасці «Гістарычны цэнтар Менску».

Антон Астаповіч: «Найбольш трывожаць наступныя моманты. Па-першае, ужо неаднаразова гаварылася, неаднаразова сыгналізавалася ў дзяржаўныя органы, у тым ліку ў праваахоўныя, пра тыя найгрубейшыя парушэньні дэталёвага пляну, які быў прыняты і зацьверджаны ў 2006 годзе. Гэта забудова на Нямізе і забудова былога базылянскага кляштарнага саду ў Верхнім горадзе. Гэта і той хмарачос на праспэкце Пераможцаў на тэрыторыі Замчышча. Гэта цэлы шэраг іншых відавочных парушэньняў. Але ў адкарэктаваным Генпляне ўсё гэта пазначана як факт, які ўжо адбыўся. Гэта азначае, што ніякіх арганізацыйных высноваў ня зроблена. Вінаватыя ў парушэньнях не прыцягнутыя нават да дысцыплінарнай адказнасьці. І праз новую вэрсію дэталёвага пляну ўсё гэта будзе легалізавана. Бо, прыкладам, ідзе спроба легімітызацыі неадэкватнай забудовы па вуліцы Гандлёвай, якая зараз гэтаксама вядзецца з парушэньнямі ўсіх рэглямэнтаў былога дэталёвага пляну, ужо ідуць працы ў новым варыянце дэталёвага пляну. То бок, зробленыя парушэньні адзначаныя як канстатацыя факту, і ўсё зноўку будзе легімітызавацца».

Падставай да такіх высноваў стала тое, што важны горадабудаўнічы дакумэнт абмяркоўваўся выключна на ўзроўні раённай адміністрацыі, без запрашэння да ўдзелу спэцыялістаў у сфэры працы з гісторыка-культурнымі каштоўнасьцямі, прадстаўнікоў профільных грамадзкіх аб’яднаньняў і творчых саюзаў. Цяпер Беларускае таварыства аховы помнікаў гісторыі і культуры будзе маніторыць сытуацыю на прадмет недахопаў і неадпаведнасьці праекту дзейным нарматыўна-прававым, тэхнічным і мэтадычным дакумэнтам.

Тое, што фашысты не даламалі, дык на нашых вачах даломваюць

Дасьледчык гісторыі архітэктуры Менску Вадзім Гліньнік таксама выказвае заклапочанасьць адносна кулюарнасьці прыняцьця шэрагу рашэньняў, якія тычацца агульнай для ўсіх беларусаў спадчыны: «Паводле маёй інфармацыі, Генэральны плян Менску быў незаконна ўзгоднены без распрацоўкі праекту зонаў аховы для гістарычнага цэнтру. Адсюль і ўсе праблемы несувымернага новага будаўніцтва ў гістарычных зонах гораду, якія абвастрыліся ў апошнія некалькі гадоў — асабліва ў апошнія год-два. Вось гэтыя пляны, яны ўсе палягаюць у абсалютна незаконным рэчышчы. Бо калі б існавалі ахоўныя зоны — не было б гэтай архітэктурнай самадзейнасьці, гэта абсалютна дакладна. Таму збольшага гэта праблема пракуратуры, а не архітэктуры. А насамрэч гэта проста нейкае стыхійнае бедзтва для ўсёй Беларусі. Паўплываць на гэта, на жаль, я не магу. Сяджу пры дарозе, што называецца, назіраю — як мой дарагі горад, у якім я вырас і 50 гадоў пражыў, зьмяняецца далёка не да лепшага. Тое, што фашысты не даламалі, дык на нашых вачах даломваюць. Прычым, вельмі шпарка».

Над гістарычным цэнтрам цяпер дамінуюць ня цэрквы і касьцёлы

У сваю чаргу Антон Астаповіч заклікае суайчыньнікаў не выпрабоўваць лёс і ўласнай пазыцыяй выказацца за будучыню Менску, які рызыкуе канчаткова страціць сваё гістарычнае аблічча. Пакуль жа разуменьня праблемы, па яго словах, у грамадзтве бракуе: «Што яшчэ вельмі моцна засмучае, дык гэта тое, што, на жаль, праблема практычна ігнаруецца і нашымі грамадзкімі структурамі, і шматлікімі сродкамі масавай інфармацыі. Каб не падтрымка вузкага кола краязнаўцаў, абазнаных архітэктараў, каб не маральная падтрымка прэзыдэнта Рады БНР Івонкі Сурвілы, якая пастаянна дасылае электронныя лісты са словамі маральнай падтрымкі нашай дзейнасьці, мабыць, і рукі ўжо даўно апусьціліся б. Але дзякуй Богу, што хоць з гэтага боку ёсьць падтрымка».

Напярэдадні Беларускае таварыства аховы помнікаў гісторыі і культуры распаўсюдзіла інфармацыю пра адсутнасьць у экспазыцыі праекту тэкставай часткі матэрыялаў тлумачальнай запіскі, пра што былі праінфармаваныя органы пракурорскага нагляду, а таксама адпаведныя ўпраўленьні Менгарвыканкаму і ўласна адміністрацыя Цэнтральнага раёну сталіцы. Уладныя структуры былі вымушаныя адрэагаваць. Гэтак, на сайце раённай адміністрацыі зьявілася паведамленьне: у сувязі з прадстаўленьнем дадатковай інфармацыі (тлумачальнай запіскі да праекту) першапачатковы тэрмін грамадзкага абмеркаваньня падоўжаны на тыдзень — да 26 студзеня.

Абмеркаваньне ў Саюзе архітэктараў (вуліца Карла Маркса, 14) пачнецца 16 студзеня а 16-й гадзіне.

http://www.svaboda.org

P.S. (дапаўнеьньне): Абмеркаваньне карэктыроўкі праекта дэтальнага планіраваньня рэканструкцыі, рэстаўрацыі, аднаўленьня і добраўпарадкаваньня Гістарычнага цэнтру Менска, запланаванае ў памяшканьні Саюза архітэктараў на 16.01.2013 г., пераносіцца на 18.01.2013 г. Пачатак абмеркаваньня - 14.00. Месца правядзеньня - Саюз архітэктараў Беларусі, вул. Карла Маркса, 14, г. Мінск.

P.Р.S. Антон Астаповіч: Якімі словамі назваць, калі спачатку дамаўляюцца пра адно, затым абяцаюць другое, урэшце рэшт потым дэкляруюць чацвёртае? Ці як назваць, калі сядаеш гуляць у карты, а твой партнёр на хаду пачынае мяняць правілы. Для мяне асабіста гэта шулерства самага нізкага і бяздарнага пашыбу.

Нечым падобным займаюцца і нашыя мінскія гарадскія ўлады. Публічная сесія грамадскага абмеркавання скарэктаванага праекта дэтальнага планіравання рэканструкцыі, рэстаўрацыі, аднаўлення і добраўпароадкавання Гістарычнага цэнтру Мінска была прызначана спачатку на 16.01.2013 г. на 16.00, учора афіцыйна мерапрыемства было перанесена на 18.01.2013 г., і вось, літаральна толькі прыходзіць ад КУП "Мінская спадчына” (служба заказчыка Мінгарвыканкаму ў Гістарычным

цэнтры) паведамленне, што абмеркаванне зноўку пераносіцца на 16.01.2013 г. на 16.00 і адбудзецца яно ў Саюзе архітэктараў (г.Мінск, вул. Карла Маркса, 14).

Гэта тэндэнцыя, гэта паказчык, што Мінгарвыканкам робіць усё, каб нейтралізаваць сваіх апанентаў праз іх дэзарыентацыю ў даце мерапрыемства, робіцца гэта нездарма, бо значыць ёсць адчуванне, што праект дэтальнага планіравання і элементарныя прававыя нормы і побач не стаяць. Публічнасць проста першкодзіць працягнуць дакумент, які створыць перадумовы для канчатковага і беспаваротнага знішчэння

якасных характарыстык Гістарычнага цэнтру сталіцы.

Таму заклікаем усіх спецыялістаў і проста неабыякавых у справе аховы гісторыка-культурнай спадчыны нягледзячы на ні на што прыняць удзел у мерапрыемстве па абмеркаванн. 16.01.2013 г. а 16-й гадзіне ў Саюзе архітэктараў па вул. Карла Маркса, 14 у г. Мінску.

Гэта не картачная гульня. Тут нехта спрабуе канчаткова разыграць гістарычнае сэрца нашага тысячагадовага гораду.